ليراه يقول فات الحال ومراحش نلحق وماكاش امل من نيتكم؟! اتوكل على ربي وابدا.. تقدر تفوت وتجيب خير من لي من بداية السنة وهو يقرا.. ماتقولش انا انسان فاشل ومانقدرش وراح الحال خاطر هادو صح الاسباب اللي يقولوهم الفشلة.. والله غير تندم برك اتخيل روحك بعيد الشر ماجبتش الباك وتسمع الزغاريت تاع النسا والناس فرحانين بولادهم.. ونتا داركم ساكتين وحتى واحد ميسيي يجبدلك على الباك خاطر راسب وخاطر حسبتلك نتا فاشل فالوقت اللي كان لازم تقرا فيه.. مام تشد تلفونك باش تنسا تصيب كامل ليريلز على الباك تاني.. وحتى زعما ليقولك انا ماجبتش الباك واستمتعت فالصيف.. تستمتع ايه مي ماشي مرتاح نفسيا.. مانقولك فات الحال ومانقولك مازال الحال.. راه الوقت باش تفطن واتوكل على ربي اذا ماشي علاجالك.. علاجال والديك.. علاجال مستقبلك.. علاجال ولادك.. آمن بروحك واتفكر كيكنت صغير وكنت تقول بلي كينكبر نولي استاذ ولا طبيب ولا ماعلاباليش.. تقبل تخذل النسخة الصغيرة منك؟ اللي كانت تقرا وتجيب مليح ولحقتك للباك.. كمل زير روحك.. شهر ونص برك.. وماتديرش حد لروحك.. خلي احلامك تفوت قدراتك.. المهم ماتحبسش وماتستلمش.. اقرا وتحلالك القراية.. كل ماتحس روحك عييت ولا كرهت اتفكر كيفاش راح تفرح ويفرحوا والديك معاك.. وباش تثبت لروحك قبل الناس اللي كانو يقولو عليك ماراحش تجيب الباك ولا ماكانوش يشفوك حاجة كبيرة.. بلي نتا تقدر وماشي غيرهوما ولا غير ولادهم.. ارفع راسك وراس والديك.. وماتنساش صلاتك وقرآنك واذكارك.. والله غير يسهلولك كلش.. اقرا باش تدير حاجة تحبها فالجامعة وباش تقرا وتستمتع ماشي تقرا فوق القلب.. اقنع روحك بلي كلش ساهل وبلي نتا ذكي وقادر بإذن الله وماكاين حتى فرق بينك وبين اللي قراو وولاو حاجة كبيرة.. وربي يوفقنا ان شاء الله 🩷🌸