❄𝑬𝒊𝒍𝒆𝒆𝒏❄

14 فيفري 2026

الرياضيات والفيزياء راهم تقريبًا واحد ⚖️ لازم بزاف تمارين، بصح قبل ما تدخل للتمارين، لازمك ملخص خاص بيك فيه: – كل القوانين ✍️ – الأسئلة النظرية (بالخصوص في الفيزياء) منين تكمل هذو، تقدر تستعمل الذكاء الاصطناعي، بصح هنا لازم تكون ذكي في التعامل معاه 🤖🧠. ما تروحش تكتب هكا: اشرحلي الدوال ❌ بهذا الشكل راح يعطيك شرح من المريخ. لازم توضّحلو وتبعثلو حاجة من المنهاج تاعكم. مثلاً: حلّيت تمرين بفكرة وحاب تثبتها، تروح عندو وتقولو: اعطيني تمرين يشبه هذا، حاب نثبت الفكرة ونشوف إذا فاهم ✔️ كون ذكي حتى نتا في الاستعمال، راهو أداة وانت لي تسوقها. بالنسبة للأساتذة: 📐 في الرياضيات: بلاي ليست الأستاذ عبد الباسط ما كانش خير منها. اتفرج، اكتب الحلول، احفظ الأمثلة، وهو يبسطلك ويعطيك رسم مليح وغني بالأمثلة. قناة نور الدين مليحة للتثبيت، بصح الطالب لي راه في الصفر ما نقدرش ننصح بها بصراحة. ⚡ في الفيزياء: ما كانش بزاف قنوات منظمة، الأستاذ عبد اللطيف مليح بصح قناتو ماشي منظمة بزاف. القناة لي عجبتني بزاف هي تاع عبد الله: يدير فيديوهات كبار وصغار، يفهم من عندو، ما يطوّلش بزاف، ويشرح شرح هايل 👌. ننصح بيهم بقوة. من بعد ما تكمل الوحدات، و تدير؟ تروح للباك، الله يسهل، تمرمد معاهم 😄، اخرج بالأفكار، وصراحة راهم ملاح. كاين ثاني سلسلة كتب نسيت اسمها، معروفة بزاف، فيها أمثلة مليحة للتلميذ الضعيف في الفيزياء، وتمارينها بالتدريج في الصعوبة. فكّروني باسمها. ومن بعد، كي تحس روحك قريب كمّلت البرنامج وهازلُو حوالي 70٪، روح عمري لسلاسل عقبة بن نافع 🔥📚 إذا تمكنت منهم، تصحصح، وتقدر تجيب فوق 19 بإذن الله 💯✨