السلام عليكم ورحمة الله وبركاته ❤️ عندي بعض الكلام لي حبيت نقولو لعل وعسى يجبر بخاطر انسان راه فنفس الحالة لي راني فيها ❤️ أنا مترشحة للباك للمرة الثالثة تحصلت عليه في بكالوريتين بمعدل 12,55-12,33 ثم قريت تخصص بعيد كل البعد عن قرايتي وفشلت فيه ، قررت هاد السنة بعد عناء طويل جدا وصراع مع نفسي ومع بيئتي وعايلتي اني نعاودو رغم كلش ، كل يوم نسمع جملة صاي كبرتي روحي كملي قرايتك خطيك مالباك ، ماراحش تنجحي وماراح ديري والو ضيعتي دراهمك وقرابتك مافلحتي فوالو ! شحال شعور صعيب انو تولي تحس روحك راك دير حاجة غالطة بالرغم انك راك فقط تسعى للأفضل وللنجاح ! يخلوك تشعر بالإحباط فكل لحظة فكل مجلس وفكل محادثة تولي نتا هو حديث الساعة كل واحد يقرر في بلاصتك واش دير وواش هو مستقبلك ، شغل هوما يعرفو خيرمن ربي لي حطك فهاد المكان وهو أدرى بك ، لازم تتعلموا حاجة اسمها الخير في ما اختاره الله لك ومدام مزالك تتنفس وقلبك مزالو ينبض مزال عندك الأمل باش ربي يوفقك لواش راك حاب ، ممكن صح ربي ماكتبلكش بصح ممكن تان انو ربي راه يمهل فيك لنجاح اعظم ، أنا بالرغم اني كنت طالبة متفوقة فأحد الأيام بصح وصلت انو ثقتي فنفسي انعدمت كليا بسبب هاد التعليقات وبسبب الاخد والرد مع أشخاص ماراهمش حاسين بيا وماراهمش فاهميني ، لذلك عندي بعض النصائح امشوا عليها نضمنلكم راح تعاونكم بزاف : - تفائلوا خيرا وأحسنوا الظن بالله فان رب الخير لا يأتي إلا بالخير ❤️ - حافظوا على صلاتكم وقرآنكم فأنتم في حاجة ماسة إلى توفيق الله عز وجل فهاد الأوقات وماتقولوش أنا جامي صليت هكدا حنولي كيشغل نتنوفق مع ربي وووو ..هاد الهدرة مكاش منها ربي ديما يديرلنا وقت نولو فيه ليه ولربما هادي هي الفرصة لي مدهالك ربي باش تولي ليه وموراها تستمر وتتقرب ليه اكثر 💕 - ماتقعدش تحكي واش قريت وواش درت أتعلم انو تقضي حوائجك فالكتمان ماشي انو ماتعاونش وتحتكر المعلومات ليك لالا حاشا ومام الأشخاص لي هنا فالمنصة ماشاء الله كامل متعاونين ولكن حولك برا ماشي لازم يعرفوا كل تفصيلة راك تمر بيها 🫶🏻 - الاستمرارية هي لي تجيب النجاح ماشي الموهبة وماشي الشغف وماشي التحفيز ، حاول انك تقرا رغم النفسية تاعك علابالي بلي كامل توصلو حد نكونو فيه عيانين وكارهين وحابين تقطعو الكراريس وترقدوا إلى ما مور الباك 😂😭ولكن لازم تعود نفسك انك تريح تقرا لأنو كاين هدف تسعى ليه ولازم توصلو ❤️ - المراجعة الدائمة هي سر المتفوقين ، كوني كنت متفوقة بمعدلات تفوق التمنطاش نقدر نجزملكم انو وحدة من اهم الاسرار تاع التفوق هو المراجعة تاع كامل المواد المراجعة بشكل يومي تخلي المعلومة تترسخ وماتتنحاش مالذاكرة حاليا بما يعرف بالتكرار المتباعد مي أنا كنت نديرو بصح مانعرفش اسمو كنت نعرف برك بلي لازم نراجع كل يوم وفقط 😂❤️بصح كانت ناجحة - ابتعدوا عن المحيط السلبي ، هادي لازم تتقسم لنوعين محيط سلبي مؤقت لي هو برا مع صحابك ولا ولي ايدا شفت انو سلبيين وهدرتهم تحبط المورال ومايعاونوكش باش تخرج افضل نسخة من نفسك ماعندك مادير بيهم خرجهم من دائرتك خلي غير الأشخاص لي يقراو والأشخاص لي يحفزوك تقرا وتنجح ، امًا بالنسبة للمحيط الدائم لي ماتقدرش تتخلص منو كالعايلة والأهل فببساطة يا امًا تتكلم معاهم وتقولهم يخلوك براحتك هاد الفترة وأنو القرار لا رجعة فيه يعني راهم يتعبو نفسهم عالفاضي يا امًا تتجاهلهم يعني كي يبداو يهدرو تروح وتخليهم لشمبرتك وتتفاداها قدر المستطاع وإلا مثلا ماقدرتش تروح ركب سماعات ودير روحك لاتي المهم والاهم هو التجاهل وكلما يهدرو قول في راصك بلي ماراحش يأثروا فيا لأنو ربي راه معايا ورح يوفقني ، وماتاخذش هدرتهم بطريقة سلبية وانما أديها كتحدي لإثبات العكس 💕🥹 وتان ماشي ايدا ماقدرتوس ديرو دروس خصوصية معنتها ماراحش تنجحو أنا شخصيا ماعنديش أصلا باش ندير فراني نحاول نقرا وحدي فالدار ماليوتيوب ومافيها والو ناجحين باذن الله ❤️وربي يوفقني واياكم لمعدل 18,50 وادعولي ولكم بالمثل أضعاف اخوتي 😊❤️❤️❤️