Lina

21 أكتوبر 2025

راح نبداو بمادة الرياضيات المادة لي يخافو منها بزااف تلاميذ (وأنا كنت منهم) هذا العام راح تقروا5محاور: الدوال كثيرة الحدود، الجذرية، الاسية، اللوغاريثمية، قوى(جامي طاحت) المتتاليات(هي ثاني فيها جذرية واسية ولوغاريثمية) الدوال الاصلية هاذي تجي في آخر الدالة ساهلة قوانين تحفظ و تطبق الاحتمالات راح توليو تخدمو بقوانين بصح ردو بالكم من شجرة الاحتمالات تسحقوها ثاني الاعداد المركبة في الاول تبان واعرة بصح كي تقراوها راح تعجبكم على خاطر نفس الأسئلة يتكرروا -درك نروحو لكيفاه تتعاملو معاها بصفة عامة: اولا لازم تبداو بالمكتسبات راهي حاجة ضرورية باه كي تدخلو تقراو تلقاو رواحكم مرتاحين لازم تعاودو قوانين الحساب(جذور،الكسور،القوى،القيمة المطلقة)في الدوال العدديةتراجعو النهايات، اتجاه التغير، جدول التغيرات، الاشتقاق،المماسات، التمثيل البياني،وكي تحبو زيدو الوسيط لانه في دراسة الدوال تكون بنفس المبدأ سواء في العددية ولا الأسية ولا اللوغاريثمية شوية تزيدو عليهم برك قوانين لازم تركزو على الدوال لأنها تجي كل عام في الباك وبنفس الأسئلة لازم تضمنو فيها أكبر عدد ممكن من النقاط كاين الأستاذ نور الدين راه داير فيديو تاع المكتسبات هو صح طويل بصح راه تبنيو قاعدة قوية باه تنطلقو في الدروس بأريحية -كيفاه تلخصو الدروس: انا شخصيا لخصت في أوراق بيضاء كنت كل وحدة نديرها في اوراق ونڨرافيهم معا بعضاهم كيما الدوال درت فيهم المكتسبات وزدت مبعد الدروس وكنت ندير في لخر أفكار التمارين من الميزان ولا لي باك ولا كتاب الدوال باه ديما نراجعهم ونتفكرهم وهك كل وحدة الدروس المهم يكون ملخص شامل فيه كلش تحبو تلخصو من كراسكم اذا كان أستاذكم يمدلكم كلش ولا من اي مصد آخر -المصادر: انا اعتمدت على الاستاذ نور الدين بنسبة اكثر صراحة هو استاذ قمة ولا كي منفهمش من عندو ساعات نقرا عند الاستاذ عبد الباسط هو ثاني شرحو هايل. التمارين كنت نحل من عند الاستاذ نور الدين (من كتابو ولا من الميزان هذاك ثاني فيه افكار رووعة تغنيكم عن اي مصدر آخر) -فيما يخص التمارين كنت كي نفض الوحدة مثلا الدوال العددية نفتح تمرين في اليوتيوب معا الاستاذ نور الدين نشوفو برك كيفا يحل ونعاود من وراه ومبعد نروح نحل الدوال تاع لي باك تاع الدوال العددية ونزيد من كتابو وهك في كل وحدة، كي تكملو لي باك تاع الشعبة تيعكم مثلا علوم تجريبية روحو زيدو حلو من تاع التقني ومبعد من تاع الرياضيات ومبعد حتى من تاع اشبال الأمة باه تشوفو اكبر كم من الافكار وتمشيو يدكم باه يكفيكم الوقت -ملاحظة: ميهمش قداه حليت من تمرين المهم التمرين لي تحلوه تحلوه وكأنكم في الامتحان بتركيز وتنظيم وتستفادو من الاخطاء لي درتوهم متقعدوش تعاودو في نفس الأخطاء، ومتقعدوش تحلو تمارين بزاف بنفس الفكرة نوعو على ما تقدرو من الافكار. •راح نحطلكم مكتسبات الرياضيات ومبعد كي تدخلو تقراو ان شاء الله كل وحدة راح نوريلكم كيفاه تقراوها قناتي بالتلجرام بها نصائح وملخصات لمن يريد الانضمام https://t.me/Ace_Your_Bac_With_Lina