𝐷𝑎𝑟𝑖𝑛𝑒

4 ديسمبر 2025

جماعة اكم شفتو كيفاه الوقت كيفاه يجري دخلتو تقراو في سبتمبر دقيقة لقيناه ديسمبر وخلص الفصل الاول وخلص الفصل الاول معناها العام خلص منيش نخلع فيكم بصح اني نقلكم بلي الوقت يجري متضيعوهش لي مزال مبداش يبدا ولي بدا يكمل ولي طاحلو المورال يدير في راسو بلي الوقت مازال وتقدرو تلحقو اني علابالي واش راني نهدر 5 اشهر تديرو فيهم لعجب والله جماعة احذفو عليكم مواقع التواصل الاجتماعي لي مافيها حتى فايدة خاوتي ديرو في راسكم بلي في هذا العام اكم وليتو كبار هذي سنة مفصلية تفصل بين هذي المرحلة لي راكم فيها مزلتو تلاميذ صغار وانكم رايحين توليو كبار وطلبة جامعيين باذن الله خاوتي العام هذا لازمكم تديرو في راسكم بلي اكم مبقيتوش ولاد صغار اكم كبار راكم وليتو رجال ونساء هذا العام لي تبنيو فيه روحكم هذا العام لي تحددو فيه شكون نتوما كي نقلكم شكون نتوما معناها واش هوما انجازاتكم واش هوما اهدافكم واش هوما المشاريع تاعكم في الدنيا هذي خاوتي اغلقو على روحكم 5 اشهر 5 اشهر اقعدو للقراية للكتابات اقراو للباك كي تحبو ترتاحو اقراو كتب اقراو روايات اسمعو بودكاست واهم حاجة لي لازم تبداو بيها نهاركم هي الصلاة في وقتها وزيدو معاها حفظ القرآن في الدنيا هذي عمرنا محسوب بالجزء من الثانية واحد فينا معلابللو وقتاش رايح يموت علابالكم عيانة هذي تاع الانسان حياتو كامل وهو يتفرج في الناس واش راهم يديرو وهو قاعد في بلاصتو ولا يدخل في صراعات غبية معندها حتى فايدة والله استغلو وقتكم ليكم عندكم في يدكم 5 اشهر والله لي ميقراش وميتسڨمش فيهم يندم عليهم والله خاوتي اغلقو على روحكم 5 اشهر بدلو العادات لي مش مليحة فيكم احفظو القرآن اقراو درك هذا هو افضل وقت تبداو في المواد الادبية ديرو برنامج دراسي ديرو خطة سنوية تاع كل وحدة في كل مادة وقتاش تكملوها ديرو خطة شهر ديسمبر ديرو خطة اسبوعية لشهر ديسمبر جيبو مذكرة ولا كراس ولا كناش اكتبو فيهم واش راحينين تيدرو اليوم وشطبو الشي لي درتوه في نهاية اليوم التزمو بعادات صحية اقسم بالله غير افضل استثمار تديروه في الدنيا هذي هو انكم تستثمرو في حياتكم هو انكم تستثمرو في روحكم تبنيو افضل نسخة منكم مكانش منها هذي تاع اني روطار راح الحال شكون قالك بلي راك في سباق قاعدين تتسابقو دركا مع بعضاكم؟ ياك كل واحد والطريقة لي يقرا بيها كل واحد والوقت لي يركز فيه كل واحد وظروفو ياك هكذا مالا مكانش منها كلمة ام روطار والناس ام لحقو انت درك راك تتسابق مع روحك مش مع الناس مراكش في سباق مع الناس افهموها اكم تقراو باه تصنعو افضل نسخة من روحكم باه توليو افضل وافضل باه تبنيو المستقبل وتكونو قدوة لبزااف ناس الهدرة هذي افهموها خاوتي والله متبعوش التفاهات مكانش كما كي تعيشو حياتكم لروحكم مش للناس ومجيتوش للدنيا باه تتفرجو ولا تبقاو تشوفو في حياة الناس اقراو اخدمو على روحكم متستلموش متياسوش مزال الحال والحال مستحيل يروح مدام الباك ملحقش مزال الحال وراكم قادرين تديرو لعجب راكم قادرين تجيو في مراتب عليا خاوتي صلاتكم حفظ القرآن طاعة والديكم قرايتكم صحتكم هكذا تنجحو في حياتكم.