BAC Students
مرحبا يا حلوين 💕 اليوم رايحة نحكيلكم على تنظيم الوقت بما انو معظمكم يعاني من هذي المشكلة و بالتالي ركزوا معايا شوفو فكرة الوقت راهي اهم حاجة كون تكون تقرا و انت ماكش منظم صدقني ماتستفادو حاجة و متعرفوش روحكم وين رايحين و وش درتو و مش مدرتوش افضل طريقة تقدرو تقراو بيها بالنسبة للنظاميين في حالة ما تروحو ليسي كي تروحو منو ديرو مادة علمية ثلاث ساعات و ساعة مادة ادبية و في ويكند تحلو تمارين شاملة تحفظوا الحفظ و تديرو تقييم شامل للأسبوع تاعكم و تكون الوتيرة فيه عالية بزاف في حالة متروحوش الليسي و أنا هذا هو. الشيء الي نفضلوا و افضل حل.( ملحوظة: الي حاس روحوا ماراهوش قادر يفهم في اليسي انا معتمدتها وين نحس روحي متأخرة نقعد في الدار سمانتين ندارك فيهم الوضع و نرجع لليسي على خااطر بنسبة ليا اول عام باك ) هنا في هذي الحالة لازم تستغلو اليوم كامل و أنا باش منتعبش منسهرش بزاف. و منبكرش بزاف يعني وسط برك و نستفاد من يوم كامل هنا تقراو مادة علمية ساعات طويلة مثلا اربعة بعدها ساعتين حفظ بعدها ساعتين لغة او تقدرو تبداو ب حفظ باش تنحيوه على طريقكم و الحفظ هنا نقصد بيه الفهم و ليس حفظ ببغاء هذاك الي ما عندو وين يلحقكم ماتهملوش مواد أدبية حذاري حذاري من الخطأ و ثاني اعتمدوا فكرة أنكم تديرو اهداف أسبوعية بمعنى كل اسبوع عندكم هدف لا بد من تحقيقه يعني تكملة وحدة او حفظ درس على حسب برنامجكم و تقدمكم بعد ما تخلصو اهداف اسبوع تروحوا تخططوا ل كل يوم وحدو يعني تقسموا الأسبوع هذاك إلى ايام و تخططوا لكل يوم وحدو وش تديرو فيه و تجبروا نفسكم ب التزام باش في نهاية اسبوع تحققوا أهدافكم و صدقوني هذاك الشعور انك كملت هدف رايح يعطيكم تحفيز كبيييير كبييير بزاففف و تحبوا تستمروا غير باش في نهاية تشطبوا أهدافكم استخدموا تقنية بومودورو بزاف تساعدكم و لكن نفضل تديرو خمسين دقيقة ب عشر دقايق لان خمسة و عشرين مش كافية ما تجيو تركزوا تفقدوه مدو راحة لنفسكم و اسمعو جسمكم نهار تكون مريض حبس نهار تحس راسك ثقيل حبس لان القراية الي تجي بعد هذاك الضغط كلها باطل و متبقاش في راسكم كل ما تكونو مستراحين جسديا و نفسيا كل ما تكون انتاجية تاعكم كبيرة وفقكم الله 💕 ادعولي معاكم😔