BAC Students
بما انو اغلبكم راه يواجه صعوبة في مواد الحفظ حبيت نشاركم طريقتي لي قريت بيها وديت +18 فمواد الحفظ نبداو اولا التاريخ والجغرافيا 🌍 لي تعتبر من اكثر المواد لي يواجهو فيها الطلاب صعوبة خاصة لطول البرنامج بالنسبة للدروس لازم اولا تقراو الطرس وتفهموه مليح اما من الاساتذة تاع القسم واما من اليوتوب لي كاين اساتذة بزاف ملاح كيما بورنان و محمد لعروق بعد ما تفهم الدرس مليح وتكون كتبت الملخ تاع الدرس لي ننصحكم تكتبوه نتوما بدلا من الاعتماد على الملخصات الجاهزة لانو راح يعاونكم في تذكر المعلومة بشكل اسرع بانك نتا لي كتبتها بعدما تكون فهمت الدرس تاعك ولخصتو مليح راح تقراه مرات متكررة وتسيي تعاود لي قريتو لاي واحد اي انو تتقمص دور الاستاذ اي اشرح الدرس لاي واحد تلقاه ولي ما لقيتش اشرحو لروحك بابسط طريقة ممكن هكذا راح تعاون مخك على ترسيخ الفكرة وعدم نسيانها بعد هذا كامل راح تتعمد بعدها على تقنية التكرار المتباعد بحيث تعود للدرس بعد ايام وتقراه وتسيي تسرجع الافكار لي حفظتها بعد ما تتكر هذه الخطوات 4 مرات نضمنلك اي درس ما راح تنساه بإذن الله اما بالنسبة للمصطلحات والتواريخ 📝 من الافضل انو تكمو ورقة بيضة وتكتبو كل المصطلحات بطريقة منظمة و تلسقوهم عند مكان الدراسة تاعكم هكا كل ما جو تقراو سيو كل مرة تحفظو مصطلح ولا تراجعو لي حفظتو نفس الشي بالنسبة للتواريخ والشخصيات برك اعتمدو على التعريف المشترك للشخصيات و التواريخ نظمو كل التورايخ تاع عام واحد واحفظوهم كيف كيف يبقاو الخرائط🗺 الخرائط نصيحة انكم تطبعو خرائط صمام و تحاولو نتوما تعينو عليهم بدا من حفظ الدول فقط بل حاولو تحفظو الدول بالتعيين على الخريطة واهم حاجة انو المادة هذي لازملكم ترافقكم منا للباك وانكم حاولو كل يوم تطلو عليها ولو مرة باش ما تنساوش واش حفظو وتوكلو على الله وان شاء الله كل واحد يوصل وين حاب فقط انتم اتخذو الاسباب والباقي على الله ❤️🩹
