ŘĮĤÃβ

16 ديسمبر 2025

‎سلام جماعة. جيتكم بتنبيه في موضوع  مهم في مادة الرياضيات. ولي هي بعض الجمل او العبارات  لي لازم نديروهم قبل ما نبداو الحل في بعض الاسئلة و نقدرو نعتبروهم كمنهجية للحل. ‎اولا: قبل الاشتقاق لازم نكتلو جملة (الدالة قابلى للاشتقاق على المجال.....)  لانو في بعض الاحيان تكون الدالة غير قابلة للاشتقاق فالمجال  لي يقولونا عليه وطبعا نكونو برهنا عليها مسبقا والاساتذة بطبيعة الحال ينحونا عليها.لذلك لازم تنتبهو. ‎ثانيا: بالنسبة لاثبات زوجية او فردية دالة ما يجب علينا اثبات شرطين إلا ان معظم التلاميذ ينساو الشرط الاول لي هو(مجموعة تعريف الدالة متناظرة بالنسبة للصفر) لانو اذا ماكامش هذا الشرط محقق بلا منكملو الشرط الثاني نقولو ديراكت الدالة غير زوجية و غير فردية. ‎ملاحظة: لي ميعرفش الشرط الثاني هو لازم: ‎     _الزوجية لازم   f(x)= f(-x) ‎      ‌_اما الفردية لازم  f(-x)= -f(x) ‎ثالثا: بالنسبة لمبرهنة القيم المتوسطة لازم نكتبو(الدالةمعرفة و مستمرة و رتيبة «يعني متزايدة ولا متناقصة» على المجال......) لانو اذا ما تحققش كاش شرط منهم منقدروش نديروها. وكذلك فالنهاية و بعد ما نديرو كامل خطوات مبرهنة القيم المتوسطة لازم نصرحو بالحلول بهذي الطريقة(من1و2«نكونو سمينا الصور لي عوضنا بالسوابق تاعهم فالدالة ولي هوما الحصر تاع الحل لي نسموه عادة α» و حسب مبرهنة القيم المتوسطة المعادلة f(x) =0تقبل حلا وحيد α «في بعض الاحيان يكون هناك حلين αو βولا مرات واحد α ولاخر معدوم حيث واحد بمبرهة القيم المتوسطة والاخر نعوضو فالدالة بالصفر نلقاوصفر» حيث : . .......<α<...... ‎يا جماعة الخير هذو مش لعبة قادر تكون عليهم 0٫5 حتى 0٫75 عليهم فالباك وبزاف اساتذة يعني متخصصين فالمجال ولي يعرفولها مليح نصحوني باش ندرب على منهجية باسكو هي لي تنحينا النقاط .ودمتم في رعاية الله وحفظه وان شاء الله نكون فدتكم رغم طول الكتابة إلا انو راني حابة كامل تفهموني بالتفاصيل باسكو هي لي ينحونا عليها بزاف .سلام ‎