Lina

23 سبتمبر 2025

أكثر حاجة يعانو منها طلبة البكالوريا هي كيفاه يقدرو يقراو بلا ميحسو بالملل وميتشتوش وبطريقة اخرى كيفاه يقنعو رواحهم اصلا باه ينوضو يقراو وميكرهوش خاطر كيما علابالنا عام البكالوريا يتطلب انكم تقراو كل نهار و تقراو كل درس في وقتو، راح نعطيكم طرق باه تشجعو رواحكم على لقراية ومتكرهوش: 1/حطو من درك قبل ماتخلاص العطلة الهدف لي حابين توصلولو و خلوه في بلاصة وين تقدرو تشوفوه كل نهار وكي نقول هدف مانقصدش فقط معدل البكالوريا ديرو كذلك آفاق هذا المعدل لي حابينو (واش حابين تقراو تخصص وواش تقدرو ديرو بيه في المستقبل يعني اكتبو فيه الصورة لي حابين تكونو عليها بعد10سنوات متضيقوش احلامكم ديما شوفو لبعيد باه تتحمسو اكثر ) اكتبو اهدافكم لهذي السنة وكذلك واش حابين تكونو في المستقبل ولماذا 2/اتفكرو بلي العلم عبادة يعني كي تخلصو قرايتكم لله سبحانه وتعالى راح تديو رضاه وربي ماهوش راح يخيبكم وراح يعطيكم على قد تعبكم مالا لازم تتعبو باه تلقاو 3/ديرو لوحة حطو فيها عبارات تحفيزية وأدعية للدراسة وحطوها قدامكم باه تتحفزو(راح نوريلكم تاعي كيفاه درتها العام لي فات في هذا الوقت) وديرو كذلك علبة زينوها وحطو فيها قصاصات كل وحدة فيها اما عبارة تحفيزية او آية قرآنية كي تقراها تطمئن وتحسها موجهة ليك او حديث نبوي شريف هذي كل ماتكرهو وتحسو انكم ماش راح توصلو لهدفكم هزو قصاصة على الزهر واقراوها صدقوني راح تحسو بسعادة وراح ترجعو تقراو 4/كي تحسو رواحكم تعبتو ماتكملوش تقراو خاطر ماكمش راح تستفادو اديو قسط صغير من الراحة بصح ماتروحوش تكوناكتيو بالتيليفون خاطر راح يلهيكم واذا هزيتوه مستحيل ترجعو تقراو اقراو صفحات من القرآن الكريم ويستحسن تقراو سورة يس راح تشحنو طاقتكم وترجعو تقراو بقوة 5/باه تطبقو الخطوة لي فاتت حاولو تشوفو قداه من الوقت تقعدو مركزين مثلا كي تجو تقراو حطو حداكم مؤقت وابداو كي تلقاو تركيزكم تشتت شوفو قداه مثلا ساعة ولا ولو كي يعدي الوقت هذاك ادو قسطكم من الراحة بصح ميفوتش 10دقايق باه ميضيعش تركيزكم وانا لا احبذ البومودورو لانه لازم يدرب مخكم على التركيز لفترات طويلة خاطر نهار الباك نتوما راح تحلو العلوم مثلا لمدة 4ساعات ونص وقادر ماتكفيكمش يعني ماش راح تحلو نصف ساعة وترتاحو 5دقايق كل مرة لازم تجيبوها ورا بعضاها وهذا يتطلب انكم تكونو متعودين على التركيز لمدة طويلة خاصة اثناء حلكم للمواضيع وهذا راح تكتاسبوه مع الوقت 6/بعدو عليكم المشتتات خاصة التيليفون اذا مكنتوش تقراو بيه خبيوه اثناء فترة الدراسة واذا كنتو تقراو بيه نحو الاشعارات ولا حاولو انكم تحملو الفيديوات لي راح تقراوها وبعد حطوه في وضع الطيران خاطر اذا جاك صوت الاشعار راح تفقد تركيزك وتبقا تخمم ندخل نشوف ولا لا وهك راح تركيزكم 7/كافئو رواحكم بعد ما تفضو مهامكم اليومية بحاجة تحبوها بصح هذا مايعنيش انكم تفضو طول تحكمو التيليفون لانه بالطريقة هذي راح تولو تزربو غير باه تفضو وتروحو للتيليفون مالا كي تكملو روحو اتمشاو في الدار، احكو مع اهلكم وبعد عادا روحو للتيليفون 8/كي تشوفو رواحكم بديتو تخممو في حاجة خلاف خاطي لقراية اكتبو هذيك الحاجة في ورقة وحطوها حذاكم هذي الطريقة جد مفيدة لخداع العقل 9/اخطيكم من العقلية تاع نستنا حتى توصل4.00ونبدا وبعد تولي4.05باه نبدا حتى تعدي ساعة ونتو قاعدين لازم تتعودو تقراو في اي وقت وهنا كاينة وحد الطريقة انكم تحسبو ل5وتنوضو مهما كنتو ديرو 10/لازم تعودو رواحكم تقرو في اي وقت وفي اي ظرف مثلا ماش تقولو حتى نوفر هذاك لكتاب باه نبدا نحل حلو من اي سلسلة اخرى حتان تجيبو لكتاب ولا مثلا حتى تكون عندي الانترنت باه نقرا 11/لازم تحطو مهامكم اليومية وتقيمو انفسكم كل نهار هل نفذتو جميع المهام ولالا وكل نهار تحولو انكم تلتزمو اكثر بالمهام لي تحطوها وديرو ايضا مهام اسبوعية يعني راح تقيمو انفسكم نهاية كل نهار ونهاية كل أسبوع _حاولو انكم تطبقو هذي النصائح قبل الدخول المدرسي باه مبعد تكونو واجدين وإن شاء الله ينفعوكم ، حاجة برك ماش اي حاجة تجي بالساهل ماش راح تقدرو تلتزمو من اول نهار بصح بالمحاولة راح تتعودو وتوليلكم حاجة ساهلة بإذن الله نتوما برك متستسلموش ومتتشاءموش خلاص تفاءلو خيرا تجدوه قناتي بالتلغرام بها دروس وملخصات https://t.me/Ace_Your_Bac_With_Lina