سارة

3 فيفري 2026

جرعة أمل 🤍 بغيت نشارك معاكم تجربتي خلال باكالوريا 2025ومعاناتي 😭 سلام عليكم أنا سارة متحصلة على شهادة باكالوريا 2025بمعدل 16.89شعبة علوم تجريبية 🙂 طبعا كبداية باكالوريا مهيش حاجة كبيرة كما ناس كامل يضخموها قبل ما تدخلو تقراو او حتى بعد رح تلقاو ناس يبالغو بانو لباك وحش وما إلى ذالك وأنو تعجيزي وأنو رح تضيع حياتك عام لباك وأنو مهما تقرا مراحش تلحق وووو 😩😩🗣... الخ وهذا ماشي صحيح كامل باك مجرد امتحان عادي كغيره من الامتحانات يتطلب فقط جهد من اول العام الى اخره 🥲🙌🏻 وصح رح تتعرضو لضغط وتوتر كبير وأفكار انو مراحش توصل وين حاب بصح لازم تكملو رغم الصغوطات وبعدو الافكار السلبية ❌ الان ننتقل الى تجربتي الشخصية انا شخصيا مقريتش من الصيف استغليتو في الراحة مع بداية القرايا بديت نبحث على اساتذة نقرا عندهم في اليوتيوب ودخلت كور مات وعلوم وجربت نقرا عند اساتذة معروفين في اليوتيوب وزدت حوست على وحدين مش معروفين وهوما لي خرجو عليا كثر ماشي شرط استاذ معروف هو الافضل لالا كل شخص وكيفاه 𑸧ي متجبروش رواحكم تكملو عند استاذ فقط انو لانو عاجب الناس ودايرين عليه ضجة 🗣🗣 قريت علوم في لكور وكنت نعاود عند استاذ كحول هشام في اليوتيوب وحليت تمارين من عند عقبة بن نافع وكتاب كتفي رياضيات قريتها عند استاذ الكور فقط لانو مكنتش نروح لليسي بسب ظروف صحية وفيزياء عند استاذ زدون محمد الامين مشاء الله صراحة هو مصدر الوحيد لي نعتامد عليه 👌 ملي بديت قريت بوتيرة بطيئة وصل منتصف شهر نوفمبر كنت قرايا بشكل ممتاز 💙لكن قدر الله مشاء فعل 🥲🥺 طحت في صحتي وصلت وين دخلت للمستشفى في الجزائر العاصمة وانا من تيارت قعدت في جزائر مدة شهر و 6ايام😷 🤕🤕اي حتى شهر ديسمبر كي رجعت لدار مطقتش نقرا وحكمني الاكتئاب 😥😨 والافكار السلبية واني نغاديش نكمل وتوقف عن الدراسة لحق جانفي وانا مزالني في هاذيك الحالة مكنتش قريا خلاص اي مانيش واجدة للباك وكنت دايرة في بالي حتى اذا عاودت بديت منلحقش 😩😭💔 نهار 24جانفي. جمعة جاتني صحبتي زعما تواسي فيا وتقولي معليش 🤌 ومزالك صغيرة وتعاوديه لعام جاي وبدات تستشفى فيا 💔😭🗣وتجطملي في المعنويات من لغيرة باسكو كنت متميزة عليها لحق ليل والله العظيم صدقوني مرقدتش 🫩ليل كامل وانا نخمم وهدرت صحبتي 🗣قعدت كي نغمة في وذنينا ⚡?جا صباح 🌤 وديكوفريت بلي مزال لوقت وانا نقدر ننجح ليمت ادواتي ورحت للكور عاودت رجعت للقراي بقوة لكن نغبت شوية باسكو كانو فايتني في الدروس 🥹💨كملت معاهم وقريت واش فاتني في الدار بوتيرة فاقت الحدود كنت نوض مع اذان الفجر منرقدش حتى 11نتاع ليل 🌃 وكامل هذا الحماس جا من كلام صحبتي والارادة رغم الضعف والمرض 😷 (فمبالكم ياجماعة وانتم في كامل صحتكم الحمد لله والله غير مزال لوقت متضيعوش رواحكم 🥹) لحق وين بقى شهر على لباك كنت كملت مواد اساسية ولحفيض ومكنتش قرايا لغات وادب 😂 قريت فرنسبة وانجليزية شوية برك (وهوما لي مخلاونيش نلحق معدل 17😭) ادب قريتها كي بقا للباك 3ايام 😲 واكثر حاجة نفعتني هيا ملخصات لي درتهم انا (متعتامدوش على ملخصات جاهزة معليش اذ اطلعتم عليهم ادو افكار بصح لازم دير ملخص نتاعك خاص فيك نتا تعرف واش فيه واش ما فيهش واش يخصك....) جاء الاسبوع الموعود ههخ 😂🥹 جوزت لباك الا اني نهار لفيزيك مرضت شوية وبسيف كملت حتى للفلسفة وزاد مطاحتش مقالة لي كنت حافظتها مليح 😂😭😭😭 والحمدلله كان لي من تعبي نصيب ربحت لباك😍 وقدرت ندير طب 🫁 وربي سبحانو عافني في صحتي جزاني مرتين والحمد له 𑹈اهم نصيحة لي كان لازم نقولها في الاول أنو تتقربو من ربي سبحانو صليو صلاتكم في وقتها وبتأني مغاديش تديلكم الوقت ⚡ ودامو على الدعاء والذكر ومتثقلوش نفسكم بالافكار السلبية ❌ واهم حاجة هيا الارادة لانها تصنع المستحيل 💪🏻 ولعل اقرب الناس اليك ميبغولكش لخير ومهمش باغيين يشوفوك تنجح فمعناه اقراو زكارة فيهم 🙌🏻 ولي يطلب مساعدة عاونوه ومتبخلوش على ناس في العلم 🌼 با ربي يبارك لكم فيه 🙂🎊 ومتنساوش لكل مجتهد نصيب 🔥👏 ان شاء الله تعجبكم تجربتي وتتحفزو شوية وخذوني كدليل انو اذا باغيين تنجحو راح تنجحو اكيد 👑?🏻