BAC Students
اغلبكم راح يبداو الفروض السمانة الجاية وكاين حتى لي عندهم هذي السمانة بصح كاينة حاجة لازم تعرفوها من قبل الفروض والامتحانات هذا العام راح تكون نوعا ما اصعب من العوام لي قبل باه يوجدوكم مليح للشهادة اذا شفتو الفروض والامتحانات تاع العوام لي فات راح تلاحظو انهم اصعب من امتحان البكالوريا والمشكلة الاكبر لي راح تواجهكم في البداية هي كيفاه تتحكمو في الوقت تاعكم باه تكملو الحل وكاينة حاجة خلاف لازم تخلوها في راسكم هي انو لازم توجدو للفرض وكأنه هو الشهادة اخطيكم من عقلية الصح في الباك لانها راح تخليكم تستهترو وراح تندمو بالتأكيد في الاخير اصلا الباك لي هو الصح راح تعقبوه بواش قريتو طيلة العام الدراسي ماشي بواش راجعتو في ليامات الاخيرة هذيك تاع مراجعة خفيفة وكاش افكار خلاف انا حابة نوصللكم انه لازم تحضرو مليح للفروض والاختبارات وتعقبوهم وكأنكم في الشهادة بصح متيأسوش اذا تعبتو ومخدمتوش الفروض والامتحانات هي فرصة باه تصلحو اخطاءكم ونقائصكم بشرط انكم هذيك الغلطة لي درتوها متزيدوش تعاودوها مرة خلاف لانه في نفس الوقت الفرض مهما كان واعر راح يكون على واش قريتو يعني اذا مخدمتوش فيه راح يكون المشكل في انكم ناقصين في حاجة معينة متقعدوش تتحجو بانه الاسئلة جات واعرة والكلمة الشهيرة لي هلكت بزاف ناس وهذا كذلك مايعنيش انو اذا خدمتو مليح معناها صايي الباك في الجيب وتدوها في رواحكم وتقللو من وتيرة الدراسة تاعكم لازم ديما تحاولو انكم تطورو من انفسكم ويهمكم انه كل يوم يعدي يكون مستواكم فيه خير من اليوم لي قبله لي مبداش يقرا قدقد مالازمش ييأس مازال الحال يشد الهمة وبإذن الله يلحق بالركب وكذلك لي بداو متفشلوش وحافظو على وتيرتكم وبإذن الله راح نبدا دروس الوحدات الثانية للي كملو الوحدات الاولى وفقكم الله ♥ قناتي بالتلجرام بها نصائح وملخصات لمن يريد الانضمام https://t.me/Ace_Your_Bac_With_Lina